La lenga ladina de le Dolomiti
Co l’espression lenga ladina (o retoromanza) se ghe dis a na famea ben slarǵada de paralde romanze, che vol dì rivade ca dal latin, sparpagnade delonch via l arch alpin zenter-oriental. Cheste le ven spartide nte trei grop prinzipai: ladin ozidental (o romanc) nte le vai sguizere del Ćanton Grisogn; ladin zentral (o ladin dolomitich) nte le vai de le Dolomiti (Veneto e Trentin-Sudtirol); ladin oriental (o furlan) ntel Friul-Venezia Giulia e Veneto. A chesti ca se jonta l ladin anaunich (nones e solander) ntel Trentin. Nte l’aial dolomitica l ladin l se spartis fora nte trei rame prinzipale:
- Ladin agordin-zoldan (“ladin-veneto” dei Autor)
- Ladin atesin (fassan, gardener, badiot e fodom)
- Ladin ćadorin (con inte anća l comelian e l’ampezan)
L ladin atesin l à termen sćiet coi dialet todesch a nord (Val de Puster), enveze a sud l ladin agordin-zoldan, l ladin ćadorin e l fassan i mostra fora dei carater de transizion che i se sbampis ntel veneto setentrional e ntel trentin dareman che se va ju drio le valade. Auter carater pi conservatif e orijinai i se mancen pi daspes nte le part aute de le vai.

