Vai al contenuto
La Federazion

Pianificazion de la lenga

Na lenga smendrada tant che l ladin, per soravive al didancuoi nte n contest sozial del nost temp, ghe ocor n ent ofizial che l se cruzie de pianificazion e politica per la duora de la lenga. Nte provinzia de Belum chesta funzion la vegniva desota dal Istituto ladin de la Dolomites aromai serà. Nte chest moment cheste funziogn le ven en part menade enavant da la Provinzia e da le Uniogn ladine (ma che le é associaziogn a piodech). Donca, tornà mete su n ent linguistich e cultural per prencurà l ladin l é valch de nezessar e da fà en pressa.

Sportel linguistich

L articol 9 de la Lege 482/1999 l consent, ntei ofizi de le aministraziogn publiche, la duora de la lenga de mendranza recognessuda, ntel descore e ntel scrive. Per sto tant le aministraziogn publiche dei teritor de mendranza linguistica le é cegnude a garantì la presenza de personal che l sie bon de responde a le domande de la jent col duorà la lenga ametuda a esse rencurada. Sincaso che no le abe personal bon assai per chi laor, cheste le pol stipulà convenziogn aposta con auter ent, publizi o privai. De chela via, l sportel de la lenga ladina l é na empresta che con chela na aministrazion publica la garantis a la popolazion l derit de comunicà per ladin.

L sportel ladin l fa part de la aministrazion onde che l é inte. L sporteler l é n laorant co na enćarega che se fa fora pichessie con contat dret co la jent, che l é soraldut i zitadign che descor la lenga rencurada. L sportel l operea da soramanech atif anter aministrazion e teritor per la promozion e stravardament de la lenga ladina: donca no l se met solche a ció su e responde fora a le domande de la jent che descor per lenga smendrada, ma l scolta su e sporz fora, e per cuant che l pol, l met a jì, le proposte e scomenzadive che ven su da una o da chel’autra banda. La duora de la lenga nte la vita publica, e en particolar nte contest aministratif, ghe dà valor e l contribuis a levà su l status.

I sportiei linguistizi ladign dei ent locai de la Provinzia de Belum i é dati su a personal bilingual de le Uniogn ladine provinziale con convenziogn aposta, per entant (2023-2026) e se spera ben no per semper.

L operador de sportel l desoz chesti laorier ca:

  • l dà fora enformaziogn per ladin sui laorier del ent publich onde che operea;
  • l śia per doi lenghe la modulistica, l material enformatif, i avis, le istruziogn ai sarvise del zitadin, l sit internet del ent onde che l operea;
  • l promuof la duora de la lenga ladina anter l personal de la aministrazion publica;
  • l parecia fora e l sparpagna material enformatif per i zitadin che l revarde i derit e oportunità che le riva ca da la normativa de stravardament de le mendranze linguistiche;
  • l se cruzia de la promozion e gestion dei proget spezifizi per l ladin;
  • l fa reclam, l sporz consulenza linguistica, cordenea le atività de stravardament e promozion linguistica pensada da auter ent e associaziogn de sti luoch.

(per studià inte se vade a vede “Il Vademecum degli sportelli linguistici” dat fora dal Consorzio Universitario del Friuli e “Bilinguism aministratif te Fascia” dat fora dal Comprenjorie ladino de Fascia)

Consulenza linguistica

L’enćarega de n ent ofizial de la lenga l é donca promuove e dà valor a la lenga sorafora la so tera e mete fora laorier de consulenza per traduziogn e pareciament. Ven su empò l suport ofert fora a duti chi che encuoicondì i se proe co la lenga ladina pichessie scrita (pro sie soget privai che publizi).

Presempio, fin da cande che l é stat metù su, l Istituto ladin de la Dolomites l s’à cruzià de sporje fora al teritor na empresta de base de laor, col fà su e col propone de le regole de trascrizion ortografiche unitarie per le varietà ladine de chi luoch. Adrio chela operazion, i laorier de consulenza linguistica ntel concret i é de comedà test scrit nuof o trascriziogn de auter che esisteva beleche. Ma anća ntel ghe ensegnà a chi autor a duorà per so cont le regole de la ortografia dita “del Istitut” anter i soci. L Istitut l aveva fat anća dassen da troi inte per mez anter i autor e l grumon de vocabolar valevoi ladign, col fornì inte soluziogn prateghe ai prim e valorisà dalvers i segont. No per ultem, soraldut per cuant defizil e la mucia de laor che l é, l Istitut l promuoveva e l sostegniva le grande opre de trascrizion e, semper de pi, de digitalisazion, presempio del vocabolar.

L é de gran emportanza e de atuazion semper pi daspes l contribut a le Aministraziogn comunale cande che ben le dezide de fà e mete fora cartiei stradai bilinguai, talian e ladin: defati ven validade le proposte de traduzion e savaiade le so trascriziogn. La consulenza ntel ćamp toponomastich (ignom dei luoch) l é de prima emportanza per enzentivà la veduda fora de la lenga ladina.

Cors de formazion

N ent ofizial de la lenga l cogna esse anća n referiment tant che zenter de formazion. L se pense a la formazion dei ensegnant de le scole, ma istes de la popolazion del luoch, operador turistizi e dependent de le aministraziogn publiche, ladinparlant e no. Chest l à da cegnì su i raport col mondo universitar, spezie proprio per via de la formazion de maestri/e e professor/e.

I cors i pol esse sie de argoment general sun storia e cultura ladina, ma anća cors proprio de lenga. L ent l tocarae esse donca n ent zertificador de esam linguistizi ofiziai che i pode dà fora na zertificazion recognessuda de cognessenza de la lenga, adrio i liviei de competenza internazionai (A1-C2).

Per l passà, darè de cors desvalif l Istituto ladin de la Dolomites, daspes anća dret da editor, l é stat bon de publicà i at dei so cors (es. la serie “Ladini Oggi”).

Nota: Sfuoi mudà fora dal so corespetif che l era inte ntel sit del Istituto ladin de la Dolomites