

Union Ladina dal Comelgo
Co le so vile vesine ma tant desferente, ligade anća a le jent todesće da dintorn, sto valon dai bosch larch l à mancegnù l Carneval anter i pi famos de le Dolomiti.
Storia
L’Union ladina dal Comelgo iné nassuda zi ane Otanta dal secul passó e tögn duce a una i grupes de Costauta, Algudnei de Dudlè, Légar e La Stua da S-ciamazen, Sot Narla da Padla.
Al grupo d Costauta inà tacó zal 1983 a föi canzogn con parole e musica originai e spetacui con recitazion par ladin in forma teatral. Apede i spetacui portade depiön al grupo musical inà publicó na vintina de musicassete, cd, ciaiute con canzogn e leture par ladin, publicaziogn d libre de storia, teatro, fotografii, poesii. Al presidente dal grupo d Costauta iné Lucio Eicher Clere.
Al grupo Algudnei inà tacó la so ativité zal 1984 col rizerche su la vita di ane passade a Comelgo d Sora come ch era stada btuda sul fotografii vece e btude sul libro “Care vece imagini”. Zi ane inà fato tante etre rizerche, in particolar el parole ladine btude zal vocabolario ladin-taliön publicó col titul “Dizionario ladino di Comelico Superiore”, e la cartina toponomastica con duce i löghes par ladin. Zal palazo dla regola inà fato al Museo Algudnei. La presidente iné Elvia Zandonella Maiucco.
Al grupo I Légar da i ane Otanta inà inbastù spetacui coi vistis dla tradizion su musiche dal carnaval dal Comelgo e portঀ depiön el coreografii del so balade. Al presidente iné Eugenio D’Ambros De Francesco.
Al grupo La Stua inà btu inze zle stanze d na ceda dla Regola el robe coioste zal pöis par al museo etnografico La Stua e fato tante iniziative come mostre d fotografii e publicaziogn d libre e giornalins. La Presidente iné Claudia Zanderigo Iona.
Al grupo Sot Narla iné nassù zi ane Doimile e inà fato diverse manifestaziogn zal pöis d Padla par valorisé la tradizion ladina. De sto grupo fa parte anche al Museo dla cultura ladina. Al presidente iné Marino De Martin Topranin.















